2007年8月5日星期日

8-5(sun) TVB最受歡迎廣告頒獎禮

原來柏芝話咁快已經生o左, 係尋日行過報攤見到明周封面話佢o地幫個仔改o左名叫"lucas"我先知...因為好幾日無睇報紙...仲俾人笑我"背"添...哈哈! 佢都真係初出道時有少少baby fat係最靚o既...睇番d舊廣告片段, 又憶起最靚時期o既佢!

今晚個"TVB最受歡迎廣告頒獎禮"...真係唔該晒! 創意可以話係零...咁樣抄人o地個idea法, 真係cheap到不能再cheap...大台點可以咁無大台風範o架?

成個節目好明顯係用o黎討好廣告商...tvb呢期廣告收入係咪下跌o左好多? 否則點解無啦啦要搞咁多o野? 仲要o係隔離台搞o左十幾年先o黎抄...真係慢人九十拍! 但係佢有咁多資源, 咁多藝人, 搞出o黎又唔覺得太有聲有色...只為sell o下旗下藝人俾d廣告商, 但淨係搵晒d三/四線o既出o黎...點sell到呀?!

阿旦做司儀都ok, 但係點解無啦啦整個鄧健泓出o黎? 佢唔係消失o左好耐o既呢咩?! 不過成個節目真係好悶, 好辛苦先睇完, 幾乎悶過亞視個廣告頒獎禮, 事關亞視有時都會有d騎呢o野睇o下...仲要o係d台詞度乘機踩對台無人睇...好無風度, 好肉酸囉...!

最大得著可能係睇到張繼聰廿幾年前個雀巢牛牛廣告, 之前youtube成日都話有, 但有咁多個15樓牛牛o既廣告, 都唔知邊個至係...依家終於知道喇!



估唔到tvb要討好廣告商, 真係無所不用其極...嘩, 睇幾集"歲月風雲", 佘詩曼不停咁o係個"雅芳婷"標誌前面轉來轉去...真係太hardsell! 雖然話依家俾廣告商買晒d時段/節目係要咁...但真係over左! 同去卡拉ok唱容祖兒d歌必會見佢整碗即食面o黎食有異曲同功之妙!

仲有, 睇報紙話d人o係討論區話最希望見到羅嘉良o係"歲月風雲"出現, 如果有佢份就會好睇好多, 話好想睇番佢同宣萱拍檔...其實我都係咁話! 佢有份做"歲月風雲"就未必可以令套戲好睇d o架喇, 套戲根本就係"先天不足", 但係我都幾想睇佢做戲, 尤其大半年前睇完"流金歲月"重播, 佢d戲真係好好, 同埋佢同宣萱做一對又真係幾無得頂...仲有, 宣萱真係要做專業人士最討好!

跟住前幾日睇報紙話撈家終於回巢拍劇...都幾值得高興! 不過拍佢"流金"個妹胡杏兒做一對又真係幾唔襯! 其實我係ok buy胡杏兒o既, 除o左"再生緣"o既"皇甫公子"年代...可能因為"律政新人王"o既佢表現真係幾突出, 個look真係好型, 同埋個角色都幾討好...我一向都幾buy呢d口齒伶俐又幾醒o既女仔! 不過唔知點解呢期d人又忽然咁唔buy佢呢? 其實佢都唔係做得太差呀? 雖然又唔係做得特別好...哎...真係可惜!

仲特登錄o左"強劍"個結局o黎睇o下...咩成家班, 又唱歌又唸晒口號咁...但個音樂同beat勁似當年亞視o既"點解阿sir係隻鬼2", 個idea就擺明係學"蓋世豪俠"個"段古母辛府"...但又同人o地當年"蓋世豪俠"個勢差好遠...!


("成家班@強劍"...哎...你睇o下喇...真係好"雞"o下!)


(1989"蓋世豪俠")