5-11(thurs) 出前一丁煮麵game

心血來潮搵番呢個年前曾勁勁勁推介o既“出前一丁煮麵game”出o黎玩…真係幾好玩, 不過一玩至少要玩成半個鐘先可以完成最後一個level! 諗番起第一次好全情投入咁玩呢個game, 原來已經係四年前, 適逢上一屆世界盃時…跟住o係英國亦都曾經有一段時間日日o係度“煮麵”…因為真係好好玩 (但係煮到隻手好痛, 因為要不停咁click隻mouse)!

每一關都要o係限時之內煮好佢要求o既麵, e.g. 10碗腿旦麵…有時仲會要求你整炒麵添…好過癮! 我話過我最鍾意呢d“萬變不離其中”o既game…玩極都唔厭! 估唔到再拿番呢個game出o黎玩o既時候, 已經係另一屆世界盃…時間未免過得太快喇!

其實幾年前已經向大家推介過呢個game, 依家再推多次…如果未玩過, 得閒不妨試o下:



http://www.nissinfoods.com.hk/chi/fans/games_03_play.asp

在“遊樂教室”內click第三個遊戲就得喇…不過要download左shockwave先

講開世界盃, 每年一到呢個季節, 就會有一大堆懶熱鬧懶有節拍懶大堆頭o既“應節歌”出爐…98年有克勤隻“球迷奇遇記”, 02年有佢隻“victory”, 相信今年都一定有番隻 (好似已經出o左添…不過唔記得叫咩名?)! 02年仲多o左twins o既“二人世界杯”同埋最頂癮o既stareast?星-eo2+e-kids+張詠詩合唱o既“魅力移動”(配合番佢o地公司個中文名“東方魅力”…可惜全部都未夠班)…今年就已經出o左隻英皇十星o既什麼“夢幻組合”…我就覺得唔多好聽喇! 仲有, 個所謂實力新人泳兒個樣真係有d怪…點解英皇唔幫佢整整先 (師姐容祖兒有版你睇)? 佢首“感應”係幾好聽, 但又未至於大家吹捧到咁好…同埋以佢o既歌藝同埋樣貌…我諗有好多人會出眾過佢…!

近期行hmv成日播"翻版王菲"胡蓓蔚同"翻版eason"劉浩龍合唱o個隻歌, 應該係伍樂城crossover林夕o個隻碟撮合o左佢o地 (仲有阿姐xkelly的"自由女神"嚇到人鼻哥窿都無肉!)...真係幾好聽喎! 我個人認為胡蓓蔚歌唱技巧比王菲更高 (基本上阿菲o既唱歌technique我不太欣賞, 仲成日走音!), 而師兄係有進步o既, 不過太似eason喇!



有日無啦啦larp o左少少“花樣中年”, 居然見到鄭嘉穎…原來佢都有做呢套劇, 真係完全唔知 (當年亦無睇過)…不過佢o個時個look, 都唔及依家! 以為佢個樣一路都無咩變, 但睇番o個時又唔夠依家好, 可能真係人紅自然靚啦!



呢排見到麥記個“飯tastic”又有新搞作, 就係搵孖妹衛蘭同衛詩首次打孖上一齊拍廣告, 仲要跳住咁鬥唸中文急口呤…兩個都好半桶水咁! 不過都幾得意, 幾有綽頭呀! 我就覺得衛詩講得好d, 好似有節奏少少!

麥記真係好鍾意玩呢d “急口呤”玩意…令我諗起廿年前一個令我好深刻o既麥記急口呤:

“雙層牛肉巨無霸
醬汁洋蔥夾青瓜
芝士生菜加芝麻
人人食過笑哈哈”

相信同我差唔多年紀o既朋友對呢個急口呤都唔會陌生, 亦相信大家都可能有去玩過個急口呤比賽! 細個時成日自以為好口齒伶俐, 最鍾意去玩呢d急口呤遊戲, 仲拿o左幾張麥記無聊“cert”證明你o係限時內完成o左個急口呤…好似好叻咁! 其實…要o係咁“長”o既限時內講完, 基本上係人都得o架啦 (除非你真係口齒極不伶俐!)…咁又有幾叻呢?! 不過細路仔係鍾意認屎認屁o架啦! (但係其實我真係覺得幾好玩, 同埋呢幾句急口呤作得好過依家個“飯tastic巴巴閉”好多…而且我都好佩服細個o既我咁唔怕羞去玩呢d遊戲…依家o既我真係屎o左好多!)