2005年9月25日星期日

9-25(sun) 金曲迴響香港情

呢篇又係應該早幾日post出o黎, 但係因為要推介湯鎮業@再睇星期五, 所以作出少少節目調動! 係之前“耀保良”o個篇提過要講o既一個節目…關於兩個人唱情歌但又毫無眼神交流o既呢…我所講o既節目就係上個禮拜早最後一輯o既“金曲迴響香港情”…而o個兩個人之唔係…曾航生同何婉盈囉!!!

本來唔係特登錄呢個節目, 但咁o岩錄開咪順手錄埋囉…點知有意外收穫! 呢集請o黎o既嘉賓同埋唱o既歌全部都好o岩我feel…好彩錄o左o黎睇o者!

首先有林志美…雖然我認為佢o既唱功大倒退, 但佢唱o左我好耐都無聽過但好鍾意聽o既80年代經典歌曲“感情的段落”…我真係覺得呢隻歌幾好聽喎! 跟住又有彭家麗唱有史以來歌名最長o既廣東歌 (未經證實)--“是不是這樣的夜晚你才會這樣的想起我”…呢隻歌仲要係我o地o岩o岩唱k先特登摷番出o黎唱! 再o黎就係播番一系列cover version o既歌…“明天你是否依然愛我”,“認錯”,“只想你會意”等…90年代初期真係好興呢d國語改廣東話, 廣東話又改番國語 (呢樣比較少) o既歌曲…確係勾起唔少回憶! 剛剛去同事屋企唱完一輪呢d舊歌…開電視仲可以聽番原唱者演繹, 實在令人高興…無線對我真係好!

但最最最精彩當然係見到十年無見o既老拍檔曾航生+何婉盈同台表演…我諗有至少十年無見過佢o地同台演出…對上一次可能係92年呢首歌plug緊o既時候! 見到佢兩個無啦啦一齊走出o黎唱“再見亦是朋友”, 簡直震撼過o係“耀保良”見到楊千嬅同鄭中基手拖手合唱…因為佢o地當年分手好似搞到好核突 (咁當然唔夠佢同魏俊杰分手搞得咁核突o既!)…咁都肯應承上節目再合作 (好可能係因為兩人都太desperate想上電視), 真係做到“再見亦是朋友”…果然係親身演繹一次隻歌o既精髓!

不過好明顯佢o地又真係有d面左左, 全程都盡量避開大家o既目光…真係“逃避你的眼光…還是要一再偷看…”…好生藹…好明顯當年真係有d唔o岩! 尤其個男人, 個樣好唔大方…不過你見佢依家黐埋個騎呢梁安琪度, 都估到佢係咩人! 都係o個句: 癡癡呆呆…點都係坐埋一?o既!

講番隻歌呀, 確實係90年代合唱歌中o既經典…一聽前奏已經有一種好熟悉o既感覺…仲要o岩o岩o係同事屋企唱k唱完“相思風雨中”, “流離所愛”&“再見亦是朋友”等超過十年?史o既經典金曲 (但其實o係我鍾意聽/唱o既歌曲當中, 呢d一點也不算舊), 點知一睇呢個節目居然有原唱者親自演繹!

何婉盈o既歌藝依舊無咩進步 (但其實咁耐無出o黎唱, 無退步已經好俾面)…尤其d高音…一聽到:“期望你轉身, 與我相…廝守”…個差d吊唔到上去o既“相”字好有佢o既style, 仲有“長夜冷冰冰”…好有十多年前的感覺…搞到我好想即刻想摷番d舊錄影帶出o黎睇!

何婉盈當年其實又係一個經典 (你見佢o係軟硬首“廣播逆fans殺人事件”?面o既“我o地支持你”度榜上有名, 就知佢有幾咁經典啦!)…由選港姐到做主持都好受歡迎, 亦極受無線戲重…點知一走去唱歌就仆直…一出場就俾人勁噓, 同譚小環o既情況有d相似 (又係選港姐, 跟住好受歡迎, 跟住做司儀, 跟住唱歌, 跟住玩完), 不過譚小環仲快玩完過佢! 起碼佢都有首經典合唱歌“再見亦是朋友”(不過譚小環都有首稍遜o既“如果天空要下雨”)…何小姐仲有首我曾經覺得幾好聽o既“周日清晨”…但十多年o黎我都再無機會聽番呢隻歌喇!

其實我當年都幾buy何婉盈o架, 尤其佢91年選港姐時已好有觀眾緣 (雖然我當時唔知點解去投o左蔡少芬一票…以當時蔡少芬o既質素, 我無可能buy佢!), 答問題時又幾牙尖嘴利…最尾五強搶答o個part好明顯係o個年特登加o黎俾佢個人表演o既, 等佢贏o左唔少分數…一選完再即刻捧佢做“勁歌”主持再拍o下劇…無線不嬲每一步都有舖排o架啦! 到後來佢去o左“長夜冷冰冰”之後再solo番隻“愛上你是我一生的錯”就開始走上不歸路…佢隻歌應該改名叫“去唱歌是我一生的錯”…唱到走晒音想唔俾人勁噓都難啦!

直至前幾年, 成日都o係hku見到佢 (當然亦都會偶然撞o下梁佩瑚)…好似係讀緊唔知咩degree, 之後佢就好似o係亞視主持o下d關於賽馬o既節目…到依家, 真係唔知佢搞咩…只知佢歌藝依舊咁好!

但點都好過曾航生…唔知點解個look變o左個好厚粉o既呀叔…戴o左眼鏡仲似個“八父”, 真係唔係人人都可以戴眼鏡o架! 可能真係相由心生…佢個樣真係有d克人憎! (無啦啦又發現o左一餅之前錄落o既sing-along演唱會錄影帶, 真係有咁o岩得咁橋, 又係有曾航生…但佢o係呢度個look又ok喎, 同以前唔係差太遠…唔戴眼鏡真係好好多! 佢又係唱“再見亦是朋友”, 原來呢隻歌有國語版添…仲有我覺得係佢咁多首歌之中最好聽o個首—“永遠幸福”…佢差唔多次次有d咩“懷舊”function都唱呢兩首歌, 原來佢真係得呢兩隻代表作…但唔好忘記佢當年係hum贏黎明拿新人金獎o既大紅人…點知之後又係變到咁唔掂…真係世事無常!)

講開曾航生首“永遠幸福”, 我好想搵番o個期另一首歌, 係黃翊o既一首四個字歌名o既歌, 又係好好聽, 仲好似入埋季選添o架! 唔記得係咪叫“最愛的妳”…有無人記得呀?

如果係now.com用戶, 可以去呢度重溫番“金曲迴響香港情”…我勁推介呀…尤其所有80/90年代的電視迷萬勿錯過!)

仲有, 睇報紙見到同曾航生,何婉盈同期o既何寶生出o左家個look…估唔到佢會走o左呢條路! 當年佢做 “娛樂新聞眼”&“週點”都做得幾好呀…仲有, 我記得睇雜誌訪問, 佢間屋幾大幾靚o架喎…好似話係有錢仔o黎!