2005年8月4日星期四

8-4(thurs) 1979

前o個排唔知點解無啦啦搵到幾餅台慶珍藏錄影帶出o黎睇, 由1999年煲到2002年 (大家千祈唔好問我借o黎睇, 呢d珍藏錄影帶係絕對唔會外借, 大家想重溫可以去YesAsia訂購台慶vcd…哈哈! YesAsia有我呢d合作伙伴算唔話得喇o卦?!)…見證o左一ja新人由茄喱啡演變成力捧新星!

首先最明顯o既就係楊怡, 之前有一篇提過見到佢o係99年台慶做陪羅嘉良出場o既“帶位女郎”, 今次睇番仲發現佢有做埋“計分小姐”(即係好似“歡樂今宵”o既歡樂小姐), 仲有o係一開場同一大班藝訓班新人一齊o係後面陪企…但鏡頭有“pen”到佢, 仲唔覺意見到馬國明…因為佢實在太高! 楊怡當年仲係似楊恭如多過似張可頤…但到o左播完“婚前昏後”之後, 我就覺得佢似張可頤多d喇! 到2001年佢已經有得同林峰, 葉璇, 廖碧兒同埋胡杏兒等一眾力捧o既新星一齊做開幕演出…可見兩年人事已經幾番身!

Image hosting by Photobucket

馬國明亦都o係2002年開始有得同一班2,3線演員一齊跳一part好短o既舞…佢o既星途好明顯比起其他同期o既人崎嶇好多…但以佢o既條件, 真係已經算係咁! 大把同佢一齊藝訓班o既仲係做緊茄喱啡!

Image hosting by Photobucket

林峰, 葉璇, 廖碧兒, 胡杏兒就基本上一出道已經係力捧新星, 所以唔多覺佢o地有做過“陪企”或者要o係人海?面尋覓佢o地…好似正當楊怡仲係做緊“計分小姐”o既時候, 胡杏兒已經係負責陪6叔出場o個個…所以話選美幾時都係易上位過參加藝訓班…所謂一夜成名嘛!

幾年台慶o既轉變可能係由企第2排變到企第1排, 由企側邊變o左企中間, 由擔一part變o左擔多幾part!

同埋睇01年台慶有個“一筆out消”台慶版, 發覺原來林峰真係有讀過o下書, 至少比較有 common sense, 答到d問題 (雖然d問題都只係“四邊形o既內角加起晒有幾多度?”咁深奧)…相反古天樂真係一題都唔識答, o下o下都pass, 仲要一邊哨住香口膠, 感覺有d過份輕佻同埋唔多尊重大會囉…仲要抵死到作為隊長, 一開口就o翕錯自已個隊名…dodo姐都忍唔住要寸佢兩嘴!

Image hosting by Photobucket

最有趣都係o係眾多dancers?面尋覓吳卓羲…呢個遊戲幾好玩喎! 又確係o係幾年台慶都見到佢…但係要經過一番努力先搵到佢! 吳卓羲就真係眾多新星中o既一個神話, 由99年o既眾多dancers?面企到幾乎最後, 到依家一下子變成最炙手可熱o既小生, 風頭仲蓋過埋林峰…真係世事無絕對!

睇番呢d台慶片段, 令我有d想重溫番“流金歲月”, 事關當年我去o左英國無睇到呢套戲, 而呢套戲就有齊晒大部份上述o既力捧新星…都幾吸引呀! (仲好似有我o既“新偶像”溫兆倫添!) 點解仲唔重播o架?!

Image hosting by Photobucket

同埋我發覺原來呢班力捧小生花旦, 大部份都係生於1979 (笨唔係1874), 果然係一個好年頭! 就好似英皇曾經有過半數歌星都係生於1980咁 (據說羊生搵呀塵伯算過, 要屬猴o既先旺佢, 所以英皇新開張時一口氣簽o左謝霆鋒, 容祖兒, 何嘉莉, 葉佩汶, 同埋呀嬌都係屬猴o既)…可能真係夾過八字!

原來生於79 o既“小朋友”係旺tvb, 早知我都整容混入去啦!

記得o個時睇“律政新人王”, 發覺4個主角當中, 有3個都係同我同年, 只有一個陳鍵鋒係生於1978…不過佢都入行十年, 其實同另外o個3個唔同level o既! (當然, 最唔同level o既力捧新星當然係馬國明哥哥啦…聽聞佢都超過30歲喇…算係一個高齡新人! 而我初時以為楊思琦都係同我o地一年, 點知原來佢係1978, 真係睇佢唔出…咁佢咪大李泳豪成兩年?! 就咁睇佢o地好似差唔多大o者!)

林峰, 吳卓羲, 楊怡, 胡杏兒, 廖碧兒…全部都係生於1979…但係最大吉利是o既係…除o左廖碧兒之外, 全部都細過我!